1ܐܝܼܢܵܐ ܒܵܗ݇ܣ ܕܙܲܒܼܢܹ̈ܐ ܘܥܕܵܢܹ̈ܐ؛ ܐܵܚܘܿܢܘܵܬܝܼ̈؛ ܠܹܐ ܝܬܘܿܢ ܣܢܝܼܩܹܐ ܕܟܵܬܒܸܢ ܐܸܠܵܘܟܼܘܿܢ. 2ܣܵܒܵܒ ܐܲܚܬܘܿܢ ܝܵܩܝܼܢ ܟܹܐ ܝܲܕܥܝܼܬܘܿܢ ܕܝܵܘܡܹܗ ܕܡܵܪܲܢ ܐܲܝܟܼ ܓܹܢܵܒܼܵܐ ܒܠܲܝܠܹܐ ܗܲܕܟܼܐ ܒܹܐܬܵܝܵܐ ܝܠܹܗ. 3ܟܲܕ ܐܵܡܪܝܼ؛ ܫܠܵܡܵܐ ܘܫܲܝܢܵܐ؛ ܗ̇ܝܓܵܗ ܡܸܢܫܸܠܬܵܢܹ̈ܐ ܒܸܬ ܩܵܝܸܡ ܥܲܠܵܝܗܝ ܬܠܵܩܵܐ؛ ܐܲܝܟܼ ܚܸܒܼ̈ܠܹܐ ܥܲܠ ܒܛܝܼܢܬܵܐ؛ ܘܠܹܐ ܚܵܠܨܝܼ. 4ܐܝܼܢܵܐ ܐܲܚܬܘܿܢ؛ ܐܵܚܘܿܢܘܵܬܝܼ̈؛ ܠܹܐ ܝܬܘܿܢ ܒܚܘܼܒܼܝܵܐ؛ ܕܗ̇ܘ ܝܵܘܡܵܐ ܐܲܝܟܼ ܓܹܢܵܒܼܵܐ ܡܵܛܹܐ ܠܵܘܟܼܘܿܢ؛ 5ܣܵܒܵܒ ܟܠܵܘܟܼܘܿܢ ܒܢܘܼܢܹ̈ܐ ܕܒܲܗܪܵܐ ܝܬܘܿܢ ܘܒܢܘܼܢܹ̈ܐ ܕܐܝܼܡܵܡܵܐ؛ ܘܠܹܐ ܝܘܵܚ ܕܠܲܝܠܹܐ ܘܠܵܐ ܕܚܘܼܒܼܝܵܐ. 6ܒܲܣ ܠܵܐ ܕܵܡܟܼܵܚ ܐܲܝܟܼ ܐَܚܹܪ̈݇ܢܹܐ؛ ܐܸܠܵܐ ܥܵܒܼܕܵܚ ܫܵܗܲܪܬܵܐ ܘܗܵܘܵܚ ܪܥܝܼܫܹܐ. 7ܣܵܒܵܒ ܐܵܢܝܼ ܕܕܵܡܟܼܝܼ؛ ܒܠܲܝܠܹܐ ܟܹܐ ܕܵܡܟܼܝܼ؛ ܘܐܵܢܝܼ ܕܪܵܘܝܼ؛ ܒܠܲܝܠܹܐ ܟܹܐ ܪܵܘܝܼ. 8ܐܝܼܢܵܐ ܐܲܚܢܲܢ ܕܝܼܘܵܚ ܕܐܝܼܡܵܡܵܐ؛ ܗܵܘܵܚ ܪܥܝܼܫܹܐ؛ ܘܠܒܼܝܼܫܹܐ ܓܲܝܸܡܟ̰ܵܪܵܐ ܕܗܲܝܡܵܢܘܼܬܵܐ ܘܕܚܘܼܒܵܐ؛ ܘܡܲܬܒܼܵܚ ܬܲܣܟܸܠܵܘ؛ ܗܹܒܼܝܼ ܕܚܲܝܹ̈ܐ. 9ܣܵܒܵܒ ܕܠܹܐ ܝܠܹܗ ܡܘܼܬܒܲܢ ܐܲܠܵܗܵܐ ܠܟܲܪܒܵܐ؛ ܐܸܠܵܐ ܠܩܢܵܝܬܵܐ ܕܚܲܝܹ̈ܐ ܒܡܵܪܲܢ ܝܼܫܘܿܥ ܡܫܝܼܚܵܐ؛ 10ܗ̇ܘ ܕܡܝܼܬܠܹܗ ܒܚܵܬܸܪܲܢ؛ ܕܐܸܢ ܪܥܝܼܫܹܐ ܝܘܵܚ؛ ܘܐܸܢ ܕܡܝܼܟܼܹܐ ܝܘܵܚ؛ ܡܸܚܕܵܪܹ̈ܐ ܥܲܡܹܗ ܚܲܝܵܚ. 11ܣܵܒܵܒ ܕܐܵܗܵܐ ܗܲܒܼ݇ܠܘܿܢ ܠܸܒܵܐ ܚܲܕَ ܠܗ̇ܘ ܐَܚܹܪَܢܵܐ؛ ܘܒܢܹܡܘܿܢ ܚܲܕَ ܠܗ̇ܘ ܐَܚܹܪَܢܵܐ ܕܵܐܟܼܝܼ ܕܐܘܼܦ ܒܸܥܒܼܵܕܵܐ ܝܬܘܿܢ. 12ܐܝܼܢܵܐ ܒܸܒܲܥܝܵܐ ܝܘܵܚ ܡܸܢܵܘܟܼܘܿܢ؛ ܐܵܚܘܿܢܘܵܬܝܼ̈؛ ܕܗܵܘܝܼܬܘܿܢ ܒܝܼܕܲܥܝܵܐ ܠܐܵܢܝܼ ܕܓ̰ܲܗ݇ܝܝܼ ܓܵܘܵܘܟܼܘܿܢ؛ ܘܟܵܠܝܼ ܩܵܕ݇ܡ ܦܵܬܵܘܟܼܘܿܢ ܒܡܵܪܲܢ؛ ܘܡܵܠܦܝܼ ܠܵܘܟܼܘܿܢ؛ 13ܕܗܵܘܝܼ ܚܫܝܼܒܼܹܐ ܠܟܸܣܠܵܘܟܼܘܿܢ ܒܚܘܼܒܵܐ ܙܵܘܕܵܐ؛ ܣܵܒܵܒ ܕܦܘܼܠܚܵܢܵܝܗܝ. ܗ݇ܘܹܡܘܿܢ ܒܫܲܝܢܵܐ ܥܲܡ ܓܵܢܵܘܟܼܘܿܢ. 14ܘܦܲܪܦܘܼܠܹܐ ܝܘܵܚ ܒܝܼܵܘܟܼܘܿܢ؛ ܐܵܚܘܿܢܘܵܬܝܼ̈؛ ܬܲܥܠܡܘܿܢ ܠܥܵܒܼܕܵܢܹ̈ܐ ܕܓܢܵܗܵܐ؛ ܘܗܲܒ݇ܠܘܿܢ ܠܸܒܵܐ ܠܟܝܼܡ ܓ̰ܘܼܪܐܲܬ؛ ܘܣܢܘܿܕܘܿܢ ܠܙܲܒܘܼܢܹ̈ܐ؛ ܘܡܲܪܝܸܟܼܘܿܢ ܒܹܢܵܘܟܼܘܿܢ ܠܟܸܣ ܟܠ ܐ݇ܢܵܫܵܐ. 15ܗ݇ܘܹܡܘܿܢ ܗܸܫܝܵܪ ܠܵܐ ܗ݇ܘܹܐ ܕܐ݇ܢܵܫܵܐ ܡܸܢܵܘܟܼܘܿܢ ܦܲܪܸܥ ܒܝܼܫܬܵܐ ܡ̣ܢ ܓܹܒܵܐ ܕܒܝܼܫܬܵܐ؛ ܐܸܠܵܐ ܒܟܠ ܙܲܒܼܢܵܐ ܪܚܘܿܛܘܿܢ ܒܵܬ݇ܪ ܛܵܒܼܵܬܹ̈ܐ؛ ܚܲܕَ ܠܟܸܣ ܗ̇ܘ ܐ݇ܚܹܪ݇ܢܵܐ ܘܠܟܸܣ ܟܠ ܐ݇ܢܵܫܵܐ. 16ܗ݇ܘܹܡܘܿܢ ܒܸܚܕܵܝܵܐ ܒܟܠ ܙܲܒܼܢܵܐ؛ 17ܘܨܵܠܘܿܝܹܐ ܕܠܵܐ ܫܠܵܝܵܐ؛ 18ܘܒܟܠ ܡܸܢܕܝܼ ܗ݇ܘܹܡܘܿܢ ܫܵܟܘܿܪܹܐ؛ ܣܵܒܵܒ ܐܵܗܵܐ ܝܠܹܗ ܪܸܙܵܝܹܗ ܕܐܲܠܵܗܵܐ ܒܝܼܫܘܿܥ ܡܫܝܼܚܵܐ ܠܟܸܣܠܵܘܟܼܘܿܢ. 19ܪܘܼܚܵܐ ܠܵܐ ܡܲܟ̰ܡܝܼܬܘܿܢ. 20ܢܒܼܝܼܵܘ̈ܬܵܐ ܠܵܐ ܡܲܣܠܝܼܬܘܿܢ. 21ܟܠ ܡܸܢܕܝܼ ܓ̰ܵܪܒܘܿܢ؛ ܘܗ̇ܘ ܕܝܼܠܹܗ ܫܵܦܝܼܪܵܐ ܕܒܼܘܿܩܘܿܢ؛ 22ܘܡ̣ܢ ܟܠ ܬܵܗܵܪ ܕܒܝܼܫܬܵܐ ܥܪܘܿܩܘܿܢ. 23ܘܐܲܠܵܗܵܐ ܕܫܠܵܡܵܐ ܒܓܵܢܹܗ ܩܵܕܸܫ ܠܵܘܟܼܘܿܢ ܒܬܲܡܵܡܵܬܘܼܬܵܐ؛ ܘܟܠܵܗ̇ ܪܘܼܚܵܘܟܼܘܿܢ ܘܓܵܢܵܘܟܼܘܿܢ ܘܦܲܓܼܪܵܘܟܼܘܿܢ ܢܵܛܸܪ ܕܠܵܐ ܡܘܼܡܵܐ ܠܐَܬܵܝܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 25ܡܗܘܼܡܢܵܐ ܝܠܹܗ ܗ̇ܘ ܕܩܲܡ ܩܵܪܹܐ ܠܵܘܟܼܘܿܢ؛ ܗ̇ܘ ܕܒܸܬ ܥܵܒܸܕ. 25ܐܵܚܘܿܢܘܵܬܝܼ̈؛ ܨܵܠܹܡܘܿܢ ܡܒܵܕܵܠ ܕܝܼܲܢ. 26ܗܲܒ݇ܠܘܿܢ ܫܠܵܡܵܐ ܠܟܠܵܝܗܝ ܐܵܚܘܿܢ̈ܘܵܬܲܢ ܒܢܫܘܼܩܬܵܐ ܩܲܕܝܼܫܬܵܐ. 27ܡܲܡܘܼܝܹܐ ܝܘܸܢ ܐܸܠܵܘܟܼܘܿܢ ܒܡܵܪܲܢ؛ ܕܦܵܝܫܵܐ ܩܪܝܼܬܵܐ ܐܵܗܵܐ ܐܸܓܲܪܬܵܐ ܠܟܠܵܝܗܝ ܐܵܚܘܿܢܘܵܬܹ̈ܐ ܩܲܕܝܼܫܹ̈ܐ. 28ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡܵܘܟܼܘܿܢ؛ ܐܵܡܹܝܢ.